ब्रेकिङ न्युज


#काठमाडौं

ओलीको निर्देशन कुर्दै ‘भूमिकाविहीन’ स्वास्थ्य राज्यमन्त्री अर्याल, उपेन्द्रले लिए ब्रिफिङ

ईखबरपत्रिका समाचार

प्रकाशित मिति: June 6,2018


RatoParkhalओलीको निर्देशन कुर्दै ‘भूमिकाविहीन’ स्वास्थ्य राज्यमन्त्री अर्याल, उपेन्द्रले लिए ब्रिफिङ

२२ जेठ–झण्डै साढे दुई महिना स्वास्थ्य मन्त्रालयको नेतृत्व गरेकी स्वास्थ्य राज्यमन्त्री पद्मा अर्याल अहिले भूमिकाविहीन बनेकी छन् । गत शुक्रबार संघीय समाजवादी फोरम नेपालका अध्यक्ष उपेन्द्र यादव स्वास्थ्य मन्त्री बनेर आएपछि राज्यमन्त्री अर्याल भूमिकाविहीनजस्तै छिन् ।

गत शुक्रबारबाट जिम्मेवारी सम्हालेका उपप्रधान तथा स्वास्थ्यमन्त्री यादव र राज्यमन्त्री अर्यालबीच मन्त्रालयको यसअघिको कामका विषयमा मात्रै छलफल भएको छ । मन्त्री अर्यालले सोमबार उपप्रधान तथा स्वास्थ्य मन्त्री यादवलाई मन्त्रालयमा भइरहेका काम, आगामी आर्थिक वर्षको बजेट तथा कार्यक्रमका विषयमा ब्रिफिङ गरेकी थिइन् ।

मन्त्री नहुँदा मन्त्रालयको सम्पूर्ण जिम्मेवारी सम्हाल्दै आएकी राज्यमन्त्री आर्यललाई स्वास्थ्यमन्त्री आएपछि कुनैपनि जिम्मेवारी दिइएको छैन । मन्त्री यादवले स्वास्थ मन्त्रालयमा कार्यभार सम्हालेपछि दैनिक काम उनैले गरेका छन् ।

राज्यमन्त्री अर्याललाई प्रधानमन्त्री केपी शर्मा ओलीले अन्य मन्त्रालयको जिम्मेवारी दिने आश्वासन दिएका छन् । तर स्वास्थ्य मन्त्रालयमा यादव आएपछि प्रधानमन्त्री र राज्यमन्त्री अर्यालबीच विभिन्न कार्यक्रममा भेटवार्ता भएको भएपनि त्यस विषयमा कुनै छलफल नभएको बताइएको छ ।

राज्यमन्त्री अर्याल यतिबेला प्रधानमन्त्री ओलीले नयाँ जिम्मेवारी दिने आशमा बसेकी छन् । उनले आफ्नो नयाँ जिम्मेवारीको विषयमा कुनै कुरा नभएको बताइन् ।

‘अहिलेसम्म मेरो नयाँ जिम्मेवारी के हुने भन्ने छलफल भएको छैन,’ स्वास्थ्यराज्य मन्त्री अर्यालले लोकान्तरसँग भनिन्, ‘म उहाँहरूकै कार्यकता हुँ, आफ्नो कार्यकर्तालाई कहीँ न कहीँ त व्यवस्थापन गर्नुहोला नि ! पार्टीले जहाँ जिम्मेवारी दिन्छ, त्यहीँ काम गरिन्छ ।’

स्वास्थ्य मन्त्रालयमा आफ्नो जिम्मेवारी खोसिएपछि राज्यमन्त्री अर्यालले स्वास्थ्यका विषयमा कुनै प्रतिक्रिया नदिने बताइन् । ‘स्वास्थ्य मन्त्रालयमा नयाँ मन्त्रीज्यू आउनुभएको छ, अब म स्वास्थ्य मन्त्रालयको विषयमा केही बोल्दिनँ,’ उनले भनिन् ।

गत मंसिरमा सम्पन्न प्रतिनिधिसभा चुनावमा अर्यालले स्याङ्जाबाट प्रत्यक्ष चुनाव जितेकी थिइन् । उपप्रधानमन्त्री समेत रहेका कांग्रेस नेता गोपालमान श्रेष्ठलाई चुनावमा पराजित गरेपछि चर्चामा आएकी अर्याल ओलीको मन्त्रिपरिषद्‌मा परेकी थिइन् । अर्याल पार्टी एकीकरण हुनुअघि तत्कालीन नेकपा एमालेकी जिल्ला अध्यक्ष समेत थिइन् ।


फेसबूक बाट प्रतिकृया दिनुहोस् :

भिडियो