ब्रेकिङ न्युज


#रुस

'स्टार' खेलाडीको जमघटले फ्रान्स पनि विश्वकपको प्रबल दाबेदार

ईखबरपत्रिका समाचार

प्रकाशित मिति: May 25,2018


RatoParkhal'स्टार' खेलाडीको जमघटले फ्रान्स पनि विश्वकपको प्रबल दाबेदार

काठमाडौं, १० जेठ –रुसमा यही मसान्तमा शुरु हुन गइरहेको फूटबल विश्वकपमा फ्रान्स पनि उपाधिको बलियो दाबेदार हो । यसका खेलाडीहरू निकै प्रतिभाशाली छन् ।

सन् १९९८ मा गृहमैदानमा फ्रान्स विश्वविजेता बनेको थियो भने सन् २००६ मा ऊ इटालीसँग फाइनलमा हार्न पुग्यो ।

प्रतिभावान खेलाडीहरूको जमघट भए पनि एउटा टीमका रूपमा एकजुट भएर नखेल्नु फ्रान्सको मुख्य समस्या हो । विश्वकप छनोटमा फ्रान्स आफ्नो समूहको विजेता रह्यो तर त्यसक्रममा उसले खराब नतिजा पनि निकाल्यो । लक्जेम्बर्गविरुद्ध घरमा गोलरहित बराबरी अनि स्विडेनसँग २–१ अन्तरको हार अनपेक्षित थियो ।

त्यसैले पनि फ्रान्सबाट कस्तो प्रदर्शनको अपेक्षा गर्ने भन्ने अन्योल छ । व्यक्तिगत रूपमा खेलाडीहरूको प्रदर्शन हेर्दा त फ्रान्स बलियो दाबेदार हो, तर टोलीकै रूपमा चाहिँ उसको प्रदर्शनमा औंला उठाउने ठाउँ छन् । 
डिडिएर देस्काम्प्स सन् २०१२ देखि फ्रान्सेली टोलीको मुख्य प्रशिक्षक हुन् । उनले यसपाली नयाँ खेलाडीहरूलाई मौका दिएका छन् ।

युरोकपको फाइनलमा पोर्चुगलसित हारेको भएपनि उक्त टूर्नामेन्टमा फ्रान्सको प्रदर्शन उत्कृष्ट थियो । आफ्नो टोलीले त्यही प्रदर्शन विश्वकपमा पनि दोहोर्‍याउने अपेक्षा प्रशंसकहरूले गरेका छन् ।

फ्रान्सको प्लेइङ इलेभनमा लोरिस, सिदिबे, भराने, उम्टिटी, मेन्डी, पोग्बा, कान्ते, मातुइदी, लेमार, एमबाप्पे र ग्रिजम्यान रहने सम्भावना छ ।

ग्रिजम्यान, पोग्बा र एमबाप्पेको प्रदर्शन विश्वकपमा राम्रो रह्यो भने फ्रान्स निकै अगाडि बढ्न सक्छ । 

नबिल फेकिर प्रतिभाशाली मिडफिल्डर हुन् र उनले खेल्ने मौका पाए भने पनि फ्रान्सलाई विश्वकपमा सहज हुने देखिन्छ । 

म्यानचेस्टर युनाइटेडबाट खेल्ने मिडफिल्डर पउल पोग्बामाथि पनि धेरैको नजर छ । उनी फ्रान्सेली टोलीका सुपरस्टार हुन्, तर उनको प्रदर्शन कहिले अत्यन्तै उत्कृष्ट हुन्छ भने कहिले चाहिँ फ्रस्ट्रेट गराउने गरी झुर खेल्छन् ।

पोग्बाको नेतृत्वमा रहेको फ्रान्सको मिडफिल्ड त बलियो छँदैछ, उसको अट्याक पनि उत्तिकै घातक छ । मार्सेईलाई हराएर युरोपा लिग जितेको एट्लेटिको मड्रिडका स्टार खेलाडी ग्रिजम्यान दुवै गोडा उत्तिकै राम्रोसँग चलाउन सक्छन् र नआत्तिकन गोल गर्छन् । उनको जादू चल्यो भने फ्रान्सले विपक्षीहरूविरुद्ध गोलको वर्षा गर्न सक्छ ।

दिमित्री पाएट चोटका कारण खेल्न नसक्नुचाहिँ फ्रान्सका लागि ठूलै झड्का हो । यस्तै बार्सिलोनाका उस्मान डेम्बेले पनि पूर्णरूपमा फिट नभएको चर्चा छ ।

बेन्जामिन मेन्दी, जिब्रिल सिदिबे, रफाएल भराने र स्यामुएल उम्टिटीले फ्रान्सको डिफेन्सलाई मजबुती दिएका छन् ।

समूह सीमा फ्रान्सका प्रतिस्पर्धीहरू डेनमार्क, पेरु र अस्ट्रेलिया छन् । फ्रान्स समूहविजेता बनेर अर्को चरणमा पुग्ने सम्भावना प्रबल छ ।


फेसबूक बाट प्रतिकृया दिनुहोस् :

भिडियो