ब्रेकिङ न्युज


#फूटबल विश्वकप

विश्वकपको घाइते बाघ ब्राजिल : गर्ला यसपाली चमत्कार ?

ईखबरपत्रिका समाचार

प्रकाशित मिति: May 23,2018


RatoParkhalविश्वकपको घाइते बाघ ब्राजिल : गर्ला यसपाली चमत्कार ?

काठमाडौं, ९ जेठ – रुसमा २२ दिनपछि शुरु हुन लागेको फूटबल विश्वकपमा ब्राजिल पनि एक दाबेदारका रूपमा रहेको छ ।

अघिल्लो विश्वकपको सेमिफाइनलमा जर्मनीले ७–१ को लज्जास्पद अन्तरले हराएपछि रन्थनिएको ब्राजिलले त्यसपछि खेलमा सुधार ल्याएको छ । त्यो विश्वकपको चोटले घाइते बनेको ब्राजिल घाइते बाघ झैं खतरनाक छ ।

पाँचचोटि विश्वविजेता बनिसकेको ब्राजिलले आफ्नो कीर्तिलाई रुसमा कायम राख्ने अपेक्षा गरिएको छ । यसपालीको विश्वकप जित्ने टोलीका रूपमा ब्राजिललाई पनि आँकिएको छ ।

ब्राजिलमा प्रतिभाशाली खेलाडीहरूको कमी छैन । एलिसन, एडर्सन, कासियो, मार्सेलो, ड्यानिलो, फिलिपे लुइस, फ्याग्नर, मर्किनोस, थियागो सिल्भा, मिरान्डा, पेद्रो गेरोमेल, विलियन, फर्नान्डिन्हो, पउलिन्हो, कासेमिरो, फिलिप्पे कउटिन्हो, रेनातो अगुस्तो, फ्रेड, नेयमार, गाब्रिएल जिसस, रोबर्टो फिर्मिनो, डग्लस कोस्टा र टाइसोन सबै प्रतिभाशाली खेलाडी हुन् ।

तर जिसस जस्ता स्ट्राइकरहरूले पहिलोपटक विश्वकप खेलिरहेकाले कसरी दबाब सम्हाल्न सक्छन्, भन्ने कुरा महत्त्वपूर्ण छ ।

हुन त सबैको आँखा नेयमारमा छ । घाइते भएपनि उनलाई विश्वकप टोलीमा समावेश गरिएको छ ।

अठार वर्षको उमेरमा ब्राजिलका लागि डेब्यु गरेका नेयमारले देशका लागि खेलेका ८३ खेलमा ५३ गोल गरेका छन् । उनी ब्राजिलका लागि चौथो सर्वाधिक गोलकर्ता हुन् । उनको ड्रिबलिङ र फिनिशिङ अब्बल छ, अनि दुवै गोडाले उत्तिकै राम्रोसँग खेल्ने क्षमता छ ।

ब्राजिलले विश्वकप छनोट खेलमा उत्कृष्ट प्रदर्शन गरेको हो । अनि टिटेले व्यवस्थापन सम्हालेदेखि ब्राजिली टोलीले विगत दुई वर्ष खेलेको खेलमा ४२ गोल हानेको छ भने जम्मा पाँच गोल खाएको छ ।

मिरान्डाको नेतृत्वमा रहेको ब्राजिलको डिफेन्सबाट पार पाउन प्रतिस्पर्धी टीमलाई गाह्रो पर्छ ।

तर ड्यानी आल्भेसले चोटका कारण विश्वकप खेल्न नपाउनुचाहिँ ब्राजिलका लागि घाटाको कुरा हो । आल्भेस नहुँदा फ्याग्नेर वा ड्यानिलोले राइट ब्याकमा खेल्न सक्छन् ।

सेन्टर ब्याकचाहिँ थियागो सिल्भाले सम्हाल्नेछन् । कउटिन्हो सेन्ट्रल पोजिसनमा खेल्न सक्छन् भने विलियन राइट विन्जरको भूमिकामा देखिने सम्भावना छ ।

ब्राजिली टोली सन्तुलित छ । उसको डिफेन्स बलियो छ, अट्याक तीखो अनि विविधतापूर्ण छ र मिडफिल्ड पनि सशक्त छ । टिटेले ब्राजिललाई बलियो टोली त बनाएका छन्, तर उनको व्यवस्थापनमा यो टोलीले विश्वस्तरीय टीमहरूसँग खासै खेलेको छैन ।

ग्रूप स्टेजबाट अघि बढ्न त ब्राजिललाई कुनै अप्ठ्यारो छैन । सेमिफाइनलसम्म उनीहरूको यात्रा सहजै देखिन्छ । त्यसपछि पनि सशक्त खेल प्रदर्शन गरेमा ब्राजिली टोलीले यसपालीको विश्वकप उचाल्ने सम्भावना छ ।

ब्राजिल ‘समूह ई’मा रहेको छ र उसका प्रतिस्पर्धीहरू स्विट्जरल्यान्ड, कोस्टारिका र सर्बिया छन् ।


फेसबूक बाट प्रतिकृया दिनुहोस् :

भिडियो